Prokuror pa dijeni mbi çështjen jep qëndrim për masën e sigurimit

Lezhë, 9 prill 2025 — Një episod i pazakontë dhe shqetësues ka ndodhur sot në Gjykatën e Lezhës gjatë shqyrtimit të një kërkese për zëvendësimin e masës së sigurimit ndaj një të pandehuri. Në sallën e gjyqit, në vend të prokurorit të çështjes, është paraqitur një prokuror i gatshëm, i cili jo vetëm që nuk kishte autorizim për ta përfaqësuar atë, por as nuk kishte dijeni minimale mbi rrethanat e saj.

Gjatë seancës, gjyqtari i çështjes e pyeti prokurorin për qëndrimin e organit të akuzës lidhur me kërkesën për zëvendësimin e masës së sigurimit me një më të butë. Me një përgjigje automatike dhe të papërgatitur, prokurori deklaroi se “nuk kanë ndryshuar kushtet dhe rrethanat që justifikojnë zëvendësimin”. Kjo deklaratë nxiti një reagim të menjëhershëm dhe të fortë nga avokati mbrojtës, i cili ndërhyri i indinjuar nga situata.

“Ky është një teatër i turpshëm. Nuk mund të hyjnë prokurorë nëpër korridore dhe të futen në sallë pa dijeni për çështjen. Si mund të thuash që nuk kanë ndryshuar rrethanat, kur ti vetë nuk di as cilat janë ato?”, u shpreh me tone të ashpra avokati, duke vënë në dukje absurditetin e situatës dhe mungesën e seriozitetit të Prokurorisë.

Ky incident hedh dritë mbi problematikën e funksionimit të sistemit të drejtësisë, sidomos sa i përket koordinimit dhe përfaqësimit të organeve procedurale. Përdorimi i prokurorëve “të gatshëm”, pa njohje të dosjeve dhe pa autorizim të posaçëm, cenon rëndë të drejtat procedurale të të pandehurve dhe integritetin e vetë procesit gjyqësor.

Ngjarja pritet të ngjallë reagime si nga komuniteti i juristëve, ashtu edhe nga publiku i gjerë, i cili kërkon një sistem drejtësie profesional dhe transparent, jo një strukturë ku “futet kush të kapet rrugës”.

Nëse situata të tilla vazhdojnë të përsëriten, ato rrezikojnë të kthehen në normë dhe jo në përjashtim — një zhvillim që nuk mund të tolerohet në një shtet ligjor.